Moskvada Azərbaycanın şərabları və turizm imkanları təqdim edilib

Moskvada Azərbaycanın Rusiyada ticarət nümayəndəsinin aparatı tərəfindən ölkəmizin məhsulları və şərablarının təqdimatı və dequstasiyası təşkil edilib.  

Moskvada Azərbaycanın Rusiyada ticarət nümayəndəsinin aparatı tərəfindən Azərbaycan məhsullarının və şərablarının “Made in Azerbaijan” brendi ilə növbəti təqdimatı və dequstasiyası təşkil olunub.

Tədbirdə Rusiyanın hökumət və biznes qurumlarının, turizm şirkətlərinin, ticarət şəbəkələrinin nümayəndələri və blogerlər iştirak ediblər. Tədbir iştirakçılarına Azərbaycan şərabları, eləcə də ölkəmizdə şərabçılığın inkişafı barədə məlumat verilib. Həmçinin Azərbaycan şərablarının Rusiya bazarında təşviqi, azərbaycanlı ixracatçıların Rusiya bazarına çıxışının genişləndirilməsi istiqamətində görülən işlərdən danışılıb. Şərab üzrə ixtisaslaşan somelyelər tərəfindən təqdim olunan məhsulların üstünlükləri, istehsal prosesi, Azərbaycanda şərab istehsalının qədim tarixi barədə təqdimat nümayiş etdirilib.

Tədbir çərçivəsində Azərbaycan Turizm Bürosunun Rusiyada nümayəndəliyi tərəfindən ölkəmizin turizm imkanları barədə geniş təqdimat keçirilib, ölkəmizdə turizmin müxtəlif istiqamətlərinə dair buklet və digər materiallar təqdim edilib.