İslam İnkişaf Bankı Qrupunun 51-ci İllik Toplantıları çərçivəsində İİB Qrupunun Müdirlər Şurasının sədri, iqtisadiyyat naziri Mikayıl Cabbarovla dialoq sessiyası keçirilib.
Bakıda İslam İnkişaf Bankı (İİB) Qrupunun 51-ci İllik Toplantıları çərçivəsində “Azərbaycan ev sahibi və əlaqələndirici kimi: yaşıl transformasiya, regional inteqrasiya və strateji tərəfdaşlıq” mövzusunda dialoq sessiyası keçirilib. İİB Qrupunun Müdirlər Şurasının sədri, Azərbaycanın iqtisadiyyat naziri Mikayıl Cabbarov İİB Qrupunun Türkiyə Regional Mərkəzinin direktoru Valid Əbdülvahabın moderatorluğu ilə sualları cavablandırıb.
İqtisadiyyat naziri Mikayıl Cabbarov balanslaşdırılmış regional inkişafın təşviqi, iqtisadiyyatın şaxələndirilməsi, bərpa olunan enerji mənbələrinin genişləndirilməsi, yaşıl iqtisadiyyata keçidin sürətləndirilməsi, rəqəmsallaşma və özəl sektorun inkişafı istiqamətində görülən işləri diqqətə çatdırıb. Eyni zamanda, regional əlaqələrin gücləndirilməsi və beynəlxalq nəqliyyat-logistika şəbəkələrində ölkəmizin rolunun artırılması məsələləri diqqət mərkəzində olub.
Bildirilib ki, Azərbaycan beynəlxalq tərəfdaşlıqların daha da möhkəmləndirilməsi, özəl investisiyaların təşviqi və regional inteqrasiyanın dərinləşdirilməsi vasitəsilə milli inkişaf prioritetlərinə töhfə verən layihələrin həyata keçirilməsini davam etdirir. Bu yanaşma iqtisadi artımın sürətləndirilməsinə, biznes fəallığının genişlənməsinə və vətəndaşların rifahının yüksəldilməsinə xidmət edir. Eyni zamanda, dayanıqlı iqtisadi inkişaf üçün əlverişli biznes mühitinin formalaşdırılması, sahibkarlığın dəstəklənməsi və özəl sektorun uzunmüddətli inkişafını təşviq edən təşəbbüslərin həyata keçirilməsi ölkənin əsas prioritetləri sırasındadır.
Sessiyada Azərbaycan ilə İİB Qrupu arasında əməkdaşlığın inkişaf perspektivləri də nəzərdən keçirilib. Qeyd olunub ki, Azərbaycan ilə İİB Qrupu arasında enerji, kənd təsərrüfatı, su ehtiyatlarının səmərəli idarə olunması, nəqliyyat və sosial infrastruktur və digər sahələrdə əməkdaşlıq uğurla inkişaf edir və bu layihələr ölkənin iqtisadi dayanıqlılığının gücləndirilməsinə mühüm töhfə verir.
Müzakirələrdə Qarabağ və Şərqi Zəngəzur iqtisadi rayonlarının potensialı, o cümlədən İİB Qrupu ilə birgə icra olunan layihələr barədə məlumat verilib. Qeyd olunub ki, İİB-lə birgə işğaldan azad edilmiş ərazilərdə həyata keçirilən su təsərrüfatı layihələri regionun kənd təsərrüfatı potensialının artırılmasına xidmət edir.
Müzakirələrdə Azərbaycan ilə İİB Qrupu arasında əməkdaşlığın genişləndirilməsinin dayanıqlı inkişaf, iqtisadi inteqrasiya və qarşılıqlı faydalı tərəfdaşlığın möhkəmlənməsi baxımından əhəmiyyət daşıdığı bildirilib.
