İqtisadi təşkilatlarla əməkdaşlıq

  • Yenilənib 13.08.2021 09:41
  • Yaradılıb 02.08.2017 10:25

İqtisadi Əməkdaşlıq və İnkişaf Təşkilatı (OECD)

 

Təşkilat haqqında ümumi məlumat. 1961-ci ildə yaradılmışdır. Baş Qərargahı Paris şəhərində yerləşir. Hazırda təşkilatın Baş Katibi cənab Anxel Qurriyadır.

Üzv dövlətlər. 38 üzv dövlətdən (Avstraliya, Kanada, İsrail, Yaponiya, Koreya, Kolumbiya, Kosta-Rika, Meksika, Yeni Zelandiya, Türkiyə, ABŞ və əksər Avropa İttifaqı ölkələri) ibarətdir.

Məqsədləri. Təşkilatın əsas məqsədləri üzv dövlətlərdə maliyyə sabitliyini qorumaq şərti ilə davamlı iqtisadi artım, məşğulluq və həyat şəraitini artırmaqla dünya iqtisadiyyatının inkişafına yardım etməkdən ibarətdir.

Azərbaycan ilə əməkdaşlıq. 

Azərbaycanın təşkilatla əməkdaşlığı 2009-cu ildən OECD-nın Avrasiya Rəqabətqabiliyyətlilik Proqramının bir hissəsi olan OECD Şərqi Avropa və Cənubi Qafqaz Təşəbbüsü çərçivəsində həyata keçirilir. Təşəbbüs “EU4Business İnitiative” ilə tərəfdaşlıq edir və 6 ölkəni əhatə edir (Azərbaycan, Belarus, Gürcüstan, Moldova, Ukrayna və Ermənistan).

Avropa İttifaqı və OECD ilə birlikdə Şərq Tərəfdaşlığı ölkələrində “Yaşıl iqtisadiyyat” layihəsi çərçivəsində əməkdaşlıq həyata keçirilməkdədir.

OECD-nin hər il Parisdə keçirilən “Avrasiya həftəsi” tədbirində İqtisadiyyat Nazirliyi tərəfindən mütəmadi olaraq iştirak təmin edilir. Tədbir çərçivəsində keçirilən Biznes Forum, İdarəetmə Şurasının iclaslarında Azərbaycan tərəfindən təqdimatla çıxış edilir. 19-21 noyabr 2018-ci il tarixlərində keçirilmiş tədbirdə İqtisadiyyat Nazirliyindən nümayəndə heyəti iştirak etmişdir. Növbəti tədbirin Tbilisi şəhərində keçirilməsi nəzərdə tutulur.

OECD tərəfindən Avrasiya Rəqabətqabiliyyətlilik Proqramı çərçivəsində təşkilata üzv dövlətlər üçün müxtəlif mövzularda təhlil icmalları həyata keçirilir. Azərbaycan üçün "Azərbaycanda kiçik və orta sahibkarlığın rəqabətqabiliyyətliliyinin artırılması islahatlarının və iqtisadi diversifikasiyanın dəstəklənməsi" mövzusunda təhlil icmalının keçirilməsi razılaşdırılmış, 19-21 noyabr 2018-ci ildə keçirilmiş Avrasiya Həftəsi zamanı təhlil icmalının təqdimatı keçirilmişdir.

"Azərbaycanda sahibkarlığın gücləndirilməsi yolu ilə diversifikasiyanın sürətləndirilməsi" və "Xarici investisiyaların yerli təchizatçılarla əlaqələndirilməsi: Qida emalı vəziyyətinin öyrənilməsi" adlı hazırlanmış yekun hesabatlar 2018-ci ilin noyabrın 19-da Parisdə keçirilən "Avrasiya Həftəsində" Azərbaycan nümayəndə heyəti tərəfindən təqdim olunmuşdur.

5 may 2020-ci il tarixində İqtisadiyyat nazirinin müavini Rövşən Nəcəf ilə OECD-nin Avrasiya bölməsinin rəhbəri Vilyam Tompson arasında videokonfrans keçirilmişdir. Görüşdə Təşkilat ilə ölkəmiz arasında mövcud əməkdaşlıq, həmçinin postpandemiya dövründə iqtisadi artımın yeni modelinin tətbiqi istiqamətində Azərbaycanda həyata keçirilməsi nəzərdə tutulan təxirəsalınmaz tədbirlərdə OECD-nin mümkün iştirak formaları müzakirə edilmişdir.

1 dekabr 2020-ci il tarixində İqtisadiyyat Nazirliyi ilə OECD-nin birgə təşkilatçılığı ilə “Azərbaycanda bərpa prosesinin dəstəklənməsi, KOB-un inkişafı və rəqəmsallaşdırılmasının təşviqi” mövzusunda vebinar keçirilmişdir. Vebinarda İqtisadiyyat Nazirliyi, Xarici İşlər Nazirliyi, Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, OECD və onun üzv ölkələri, Avropa İttifaqı, UNIDO və UNECE, Dünya Bankı, Beynəlxalq Ticarət Mərkəzi, Azərbaycan Sahibkarlar (İşəgötürənlər) Təşkilatları Milli Konfederasiyası və özəl sektordan ümumilikdə 100-ə yaxın nümayəndə iştirak etmişdir. Tədbirdə iqtisadiyyat naziri Mikayıl Cabbarov və Avropa İttifaqının Azərbaycan nümayəndəliyinin rəhbəri səfir Kestutis Yankauskas açılış nitqi ilə çıxış etmişdirlər.

12 fevral 2021-ci il tarixində iqtisadiyyat nazirinin müavini ilə OECD-nin Avrasiya bölməsinin rəhbəri arasında videokonfrans keçirilmişdir. Görüşün keçirilməsində əsas məqsəd OECD tərəfindən təklif edilən “Azərbaycanda kiçik və orta müəssisələrin rəqəmsallaşdırılmasının təşviqi” mövzusunda layihənin müzakirəsi idi. Sözügedən layihənin əsas məqsədi rəqəmsal texnologiyalardan istifadənin təşviq edilməsidir. Hazırda layihə həyata keçirilməkdədir və 10 iyun 2021-ci il tarixində layihənin İşçi Qrupunun virtual formatda 1-ci görüşü keçirilmişdir. 

← Geriyə